Guðlaugur Kr. Jörundsson

Vodafone ekki með samkeppnisfært ljós

Lengi vel var ég með ADSL tengingu hjá Vodafone og líkaði vel. Fyrir rúmu ári var ljósleiðari tengdur í íbúðina mína og þá skipti ég yfir í Hive. Nú er Vodafone að bjóða internettengingu í gegnum ljósleiðarann (frá Gagnaveitu Reykjavíkur). Ég vil gjarna losna við Hive og skipta aftur yfir. En ég lýsi yfir vonbrigðum mínum með uppsetninguna hjá Vodafone.

Gagnaveitan auglýsir að internetið í gegnum ljósleiðarann sé með sama hraða í báðar áttir. Hjá Hive er ég með 10 Mb/s í báðar áttir. Vodafone hefur hins vegar tekið fáránlega ákvörðun um að takmarka sendingarhraðann. Minni sendingarhraði er óumflýjanlegur í ADSL kerfinu, en Vodafone hefur tekið þá ákvörðun að nýta ekki nýja tækni til fulls. Þeir eru að reka undarlega haftastefnu.

Sjálfur er ég með Ljós 10 hjá Hive. Greiði fyrir það 4 þús. krónur á mánuði. Þar sem mér er annt um sendingarhraða þá er ódýrasti pakkinn sem kemur til greina hjá Vodafone á 6 þús. krónur. Þar fæ ég þó umfram niðurhalshraða upp á 2 Mb/s, eða alls 12 Mb/s og 10 Mb/s sendingarhraða. Þar að auki fæ ég 10 sinnum meira í erlent niðurhal, sem ég hef reyndar engin not fyrir. Það mun því kosta mig 2 þús. krónur á mánuði að skipta í Vodafone. Það er því ekki að gerast.

Það er erfitt að bera saman Ljós 10 við Vodafone pakkana. En tökum nú beinan samanburð. Ljós 20 hjá Hive er á 6 þús. krónur eins og 12 Mb/s tengingin hjá Vodafone. Hive rústar Vodafone í þessum samanburði.

Niðurstaða: Vodafone leyfir viðskiptavinum sínum ekki að nýta kosti ljósleiðarans og bjóða ósamkeppnisfær verð. Spurning hvort þessi takmörkun á sendingarhraða sé gerð með vitneskju Gagnaveitunnar, sem auglýsir svo skýrt sama hraða í báðar átti á internetinu. Ég skora á Vodafone að hysja upp um sig buxurnar og gera betur svo ég geti flutt viðskipti mín aftur til þeirra.